初次見面

聽過唔少新郎哥係結婚擺酒個晚，講番點認識新娘子。其中有唔少係朋友介紹，又話係酒吧相遇。

唔知係唔係緣份，當晚你座係我背面個枱。無機會交談，只係知你係新郎哥既同事。其實自己早早到場，已經係場內遊走左幾轉，但對你印像最深刻。

第二天已即時上facebook碰碰運氣。經過一輪搜查，將你加入為朋友列。初頭都係留下言，送上網上圖案。你主動係msn add我，結果就由單向留言，變成雙向溝通。閒談左幾日，終於都交換左電話，同約好首次見面既日子。

初期最煩係決定晚飯地點，但又無理由要個女仔陪自己周街搵位。在同事建議下，都有左眉目，但又忽然收到通知話要改期，個心都沉左一沉。但轉個頭又可如常進行。

其實食下飯仔，自己無咩壓力，亦都唔會怕無話題。反而細節上，自己就會好擔心。心怕會唔會訂錯位，又怕根本間餐廳大把位，訂位都無謂。

出發前，自己都勉強算梳洗配襯下先出門。為左了解環境，早早已經落左餐廳附近。臨近七點，一路望住個錶，又唔敢打比你，免得以為我吹你。估唔到係我打比你時，你又打比我。

其實條街人來人住，大家又係第一次見。感覺一眼間，見到有個女仔急急步在人群中走過。已經懷疑係唔係你，結果真係無估錯。

去到餐廳，忽然間好鬼多人。好彩一早訂左位，如果唔係真失禮。坐係餐廳既一角，終於正式開始閒談。第一個感覺係同上次見面好唔同，不過笑起上來，感覺都算唔錯。餐飯唔算食左太耐，但總算沒有冷場。食完飯，行左幾步就各自回家。

之後既日子，就變左係手機短訊互通。我打一段，等唔知幾耐你就回番幾隻字。暫時都係一日一句，可能好快會回塘。

其實自己唔清楚係咪真係鐘意，好多時著重過程大於結果。亦可能太長既單身日子，根本唔識照顧同關心別人。唔只一次有女女話我太自我中心，太收埋自己，缺乏安全感。其實連自己都唔知點先算安全感，又點可以比到人呢?